Shtetet e Bashkuara kanë deklaruar të martën se ende ekziston rreziku i vënies së tarifave në vlerë të 50 milionë dollarëve në importet që vijnë nga Kina, nëse kjo e fundit nuk e adreson çështjen e vjedhjes së pronës intelektuale, transmeton Reuters.

Shtëpia e Bardhë ka njoftuar përmes një deklarate se në kuadër të masave kundër Kinës, do të jetë dhe kufizimi i investimeve të kompanive kineze në ShBA.

Detajet për këto investime do të njoftohen më 30 qershor derisa lista përfundimtare e tarifave do të publikohet me15 qershor.

Deklarata e së martës ka ritheksuar edhe një herë komentet e zyrtarëve të administratës së Trumpit, të cilët kanë thënë se tarifat dhe kufizimet tjera vazhdojnë të jenë ende si mundësi edhe pas hartimit të një marrëveshjeje nga ana e Kinës, e cila parashah reduktimin e suficitit tregtar që ka Kina me ShBA-në, në vlerë të 375 miliardë dollarëve.

Ndonëse Uashingtoni nuk është tërhequr nga kërcënimi për vënie të tarifave në importet e Kinës, Pekini ka reaguar ashpër ndaj kësaj deklarate duke thënë se është befasuar nga qëndrimet e së martës dhe se do të mbrojë interesat e veta.

Kërcënimet për nisje të luftës tregtare në mes të ShBA-së dhe Kinës kanë goditur tregjet financiare, mirëpo shumica e ekonomistëve besojnë se të dy palët do të menaxhojnë situatën dhe do t’i ikin konfliktit.