Së paku dy persona raportohet të kenë vdekur nga vërshimet e ashpra në Sicili, në jug të Italisë, pasi një stuhi e fuqishme ciklonike i shndërroi rrugët në lumenj e i detyroi dyqanet që të mbylleshin në një qytet të rëndësishëm.
Në pamjet e publikuara në internet shihet uji që rrjedh rrugëve në Katania, qytet në pjesën lindore të ishullit italian, që është goditur rëndë nga vërshimet, shkruan Independent.
Veturat u panë të mbuluara pjesërisht nga uji dhe rrënojat u shpërndanë rrugëve pas reshjeve të dendura të shiut.
Sipas kryetarit të qytetit, Katania e ka përjetuar sasinë mesatare vjetore të reshjeve për vetëm 48 orë.
Një zëdhënës i grupit të vullnetarëve “Misericordie” tha se trupi i një burri është gjetur nën një veturë në qytezën Gravina, në veri të Katanias, në kohën e vërshimeve. Mediet lokale raportuan se trupi ishte i një burri 53-vjeçar.
Të hënën, një burrë 67-vjeçar vdiq, pasi vetura e tij u godit nga uji dhe balta. Ekipet e shpëtimit thanë se po e kërkojnë bashkëshorten e tij, e cila është zhdukur.
Reshjet kanë përmbytur disa nga rrugët dhe sheshet më të famshme të Katanias, duke shkaktuar ndërprerje të rrymës në qendër të qytetit dhe duke i vërshuar dyqanet.