Shërbimi Korrektues i Kosovës ka shtrënguar masat për të gjithë të burgosurit, për shkak të gjendjes së përgjithshme në të cilën gjendet vendi si pasojë e COVID-19.

Përmes një komunikate për media, SHKK-ja ka njoftuar se do të ndalojë vizitat familjare për të gjitha kategoritë e të burgosurve, ndalimin e vikendeve për të dënuarit nëpër institucionet korrektuese e disa masa të tjera.

“Ndalimin e vizitave familjare për të gjitha kategoritë e të burgosurve, ndalimin e vikendeve për të dënuarit nëpër institucionet korrektuese, ndalimin e vizitave në lokalet e veçanta, aplikimin e sistemit virtual të komunikimit “Skype” lejimin e numrit të shtuar të thirrjeve telefonike gjatë kësaj periudhe, pastrimi i rrobave për të paraburgosur do të organizohet në Institucione”, thuhet në njoftim.

Sipas SHKK-së, nga këto masa përjashtohen Institucioni i Avokatit të Popullit dhe mbrojtësit (avokatët) në rastet kur gjykimi është në zhvillim.

“Shërbimi Korrektues i Kosovës do të vazhdojë bashkërendimin institucional me institucionet relevante të Republikës së Kosovës dhe do të mbajë të informuar opinionin publik rreth hapave në vazhdim”, thuhet tutje në njoftim.