Në prag të nisjes së Lojërave Olimpike, Komiteti Olimpik Kombëtar Shqiptar njoftoi se notari kuqezi Sidni Hoxha, në bazë të rezultateve dhe kohëve të regjistruara, do të konkurronte në dy gara – 100 metra stil i lirë dhe 50 metra stil i lirë.

Më datë 9 gusht ishte programuar gara e 100 metrave, por Hoxha nuk u pa askund, e për këtë trajneri personal i notarit shqiptar, Shpëtim Hoxha, i cili njëkohësisht është president i Shoqatës “Tirana Delfina Sport”, ku aktualisht bën pjesë edhe 24-vjeçari, akuzon përfaqësuesit e Komitetit Olimpik për papërgjegjshmëri dhe neglizhencë, pasi që ata nuk e kanë regjistruar emrin e sportistit për këtë garë në mbledhjen teknike që i parapriu, në mënyrë të pashpjegueshme nuk kanë marrë pjesë në këtë mbledhje.

“Sidni nuk ka marrë pjesë jo për fajin e tij, pasi në mbledhjen e fundit që është komisioni teknik, që është mbledhja deçizive ku vendosen edhe garat e tjera, Komiteti Olimpik Shqiptar nuk ka qenë pjesëmarrës në këtë mbledhje dhe për këtë arsye në mënyrë automatike Sidni është përjashtuar nga gara 100 metra. Mospjesëmarrja e tyre në një komision teknik tregon papërgjegjshmëri, por dhe papërvojë.

Përbën atë që quhet neglizhencë absolute. Sigurisht se Federata e Notit mban përgjegjësi për dërgimin e një trajneri të papërgjegjshëm i cili nuk kujdeset aspak për çështjet e rezultateve dhe që gjithçka të shkojë mbarë”, ka thënë trajneri për “Oranews”.