Shërbimi Spitalor Klinik Universitar i Kosovës ka njoftuar se një faqe në rrjetin social në Facebook, me emrin “Qendra Klinike Universitare e Kosovës”, e cila vazhdimisht po shpërndan lajme për interesa të caktuara, nuk paraqet qëndrimin zyrtar të institucionit.

SHSKUK e ka adresuar shqetësimin dhe pret nga organet kompetente të merren me rastin.

Në kuadër të përpjekjeve për të bllokuar mundësinë e publikimit të informacioneve të pasakta, tendencioze e qëllimkëqija, institucioni ka raportuar çështjen edhe në Facebook.

Andaj, të nderuara media, me qëllim që të informoheni dhe të raportoni saktë, në mënyrë që të mos viheni në lajthitje dhe të bini pre e agjendave të caktuara, ju ftojmë t’i referoheni faqes sonë në Facebook, QKUK-Shskuk info, për të mësuar rreth punës dhe aktiviteteve të institucionit.

Adresat tjera, në emër të SHSKUK-së dhe QKUK-së, janë fiktive dhe kanë për qëllim të baltosin dhe komprometojnë punën që po bëhet në institucionet shëndetësore.

“Çdokush që shfrytëzon llogari tjera dhe shmang linjën e komunikimin zyrtar për çështjet që ndërlidhen me shërbimin spitalor dytësor dhe shërbimin spitalor tretësor, do të gabojë, duke dezinformuar publikun dhe, në këtë rast, përgjegjësinë do ta marrë vetë”, thuhet në njoftim, transmeton Ekonomia Online.