Përfaqësues të Lëvizjes Vetëvendosje dhe NISMA për Kosovë kanë shpeshtuar takimet në kohën kur po afrohet dita për votim të kryetarit të Kuvendit të Kosovës, dhe rrjedhimisht edhe formimit të Qeverisë.

Burime të arbresh.info bëjnë të ditur se ka patur edhe një takim tjetër ndërmjet liderëve të dy subjekteve politike, Fatmir Limaj e Albin Kurti, në kohën kur nuk dihet nëse lideri i PDK-së, Kadri Veseli, do të marrë votat e mjaftueshme për kryetar të Kuvendit të Kosovës, sikurse edhe i nominuari nga PAN-i për kryeministër, Ramush Haradinaj.

Po ashtu, nga ora 11:00 Veseli është në takim me strukturat udhëheqëse të PDK-së, dhe në këtë takim arbresh.info mëson se po flitet për formimin e institucioneve.

Nesër pritet të mbahet takimi konsultativ ndërmjet partive politike në Kuvendin e Kosovës, në ndërkohë vazhdimi i seancës për konstituimin e plotë të Kuvendit do të ndodhë të enjten.

PAN-i nuk lëkundet nga nominimi i liderit të PDK, Kadri Veselim për kryetar të Kuvendit, i kundërshtuar nga LVV dhe LAA.

PDK ka bërë të ditur se Veseli tërhiqet nga kandidatura, nëse i nominuari për kryeministër nga PAN, Ramush Haradinaj, do të votohej nga LVV e LAA.

Minoritetet deri më tani kanë shprehur qëndrimin pozitiv në mbështetje të Veselit për kryetar të Kuvendit të Kosovës, por ende nuk dihet se kë do të mbështesin për të formuar Qeverinë.

I vetmi që ka propozuar një gjithë përfshirje politike në Qeveri për një kohë të caktuar, për të kaluar disa nga proceset kryesore të cilat duhet të kalojë Kosova urgjentisht, është presidenti i Aleancës Kosova e Re, Behgjet Pacolli.