Ministri i Punëve të Brendshme, Xhelal Sveçla, i ka reaguar Departamentit Amerikan të Shtetit.

Sipas Sveçlës etiketimi i veprimeve të ligjshme të policisë si “të dhunshme” dhe operacionit të saj si “dhunë”, është “ftesë” për Radojçiqin për të sulmuar policët e Kosovës.

“Cilësimi i veprimeve të ligjshme dhe të civilizuara të Policisë së Kosovës si ‘të dhunshme’ dhe operacionit të saj të zbatimit të ligjit si ‘dhunë’ është një ‘ftesë’ për Milan Radojçiqin e futur në listën e zezë të SHBA-së për të komanduar mashtruesit e tij për të sulmuar policët e Kosovës”.

Sveçla tha se keqinterpretimi i realitetit në këtë situatë mund të rezultojë me kosto njerëzore.

Të gjithë duhet të veprojnë me përgjegjësi. Çdo humbje jete duhet të parandalohet me kujdes maksimal. Zgjedhja e ekuilibruar e fjalëve në këtë situatë është thelbësore”, tha Sveçla, përcjell Klankosova.tv.

Më tej, ai ka uruar policinë për profesionalizmin e treguar në mbrojtje të institucioneve të Kosovës.

“Kryetarët e komunave të Zveçanit, Zubin Potokut dhe Leposaviqit janë vendosur në zyrat e tyre në objektet komunale. Ata do të vazhdojnë punën e tyre. Urime Policisë së Kosovës për profesionalizmin në mbrojtjen e institucioneve, sundimit të ligjit dhe demokracisë nga grupet e organizuara kriminale”, tha ai.