Shefi i Grupit Parlamentar të Aleancës për Ardhmërinë e Kosovës (AAK) Besnik Tahiri pas dështimit të mbajtjes së seancës, tha se kjo parti kishte konfirmuar për të dhënë votën pro marrëveshjes.

Ai kritikoi pozitën për dështim të seancës, duke vlerësuar se Kosova është më e dobët si në brenda ashtu edhe jashtë.

Tahiri shtoi se Qeveria nuk ka dashur të diskutojë as për policët që janë të rrezikuar.

“Sot jemi dëshmitar të anulimit të qëllimshëm të një seance, për me i ikë debatit për skandalin ‘Zdravo’ që tashmë iu ka shtuar emri ‘zejtin’, por edhe disa marrëveshjeve ndërkombëtare, për të cilat ne kemi premtuar me dhanë votën sot”, ka thënë Besnik Tahiri.

“… janë gënjeshtra të pastërta ajo që flitet për rritje të pagave, 6 muaj s’kanë mbërri me përgatitë një rregullore për shtesa për rrezikshmëri”.

Ndërkaq deputeti Bekë Berisha vlerësoi se skandali me blerjen e vajit tregon vetëm mendësinë e e mbrapshtë të Qeverisë Kurti.

“Rasti i skandalit të fundit me vajin, tregon mendësinë e kësaj Qeverie. E dini sa shumë është akuzuar një Qeveri më e hershme, duke i thënë se janë harxhuar rezervat shtetërore, në fakt ato janë zëvendësuar me artikuj tjerë me afat më të gjatë”.

“Çka na bënë të dimë se si funksionon kjo Qeveri? Në momentin kur janë duke folur me Listën Serbe, e zgjasin gishtin prej tjerëve, duke thënë se këta kanë folur ose janë takuar. Në momentin kur e zgjasin gishtin për rezervën shtetërore, i bie që këta janë duke vjedhur në rezervën shtetërore. Ky nuk është zëvendësim i produkteve, por është hajni e pastër. Kjo është mendësi e kësaj qeverie, dhe sa herë i shohim duke e zgjatur gishtin për një çështje të caktuar, duhet hulumtuar se janë duke vjedhur për atë çështje”, përfundoi Berisha.