Telekomi i Kosovës ka reaguar pas raportimeve në disa medie se kjo kompani publike ka shpenzuar mbi 200 mijë euro për të blerë 305 telefona të teknologjisë së fundit për stafin e lartë.

Telekomi i Kosovës ka reaguar në lidhje me lajmin për blerjen e 305 telefonëve të mençur.

Telekomi sqaron se këta telefona nuk janë për menaxhmentin, por për konsumatorët në kuadër të ofertave për shërbime “Vala postpaid”.

Reagimi i plotë:

Telekomi i Kosovës, me qëllim të informimit të drejtë mbi gjendjen aktuale si dhe transparencën në raport me gjendjen ekonomike dhe shpenzimet, njofton opinionin publik se shkrimi në disa media eletronike, me titull “Telekomi i Kosovës blen telefona të mencur-305 për menaxhment…”, është i pasaktë dhe i pavërtetë, për arsye se ka mbi 10 vite që Telekomi i Kosovës ka kontrata postpaid me institucione publike, komuna, universitete, kompani te ndryshme si dhe konsumatorë tjerë, dhe se këta telefona janë 100% të dedikuar vetëm për konsumatorë, të cilët kanë shërbime Vala postpaid (me telefon) dhe si rrjedhojë keto janë obligime kontraktuale në mes të Telekomit dhe institucioneve të ndryshme dhe bizneseve, dhe për asnjë moment kjo blerje nuk ka destinim qe këta telefona t’i jepen në perdorim menaxhmentit.

Shkrimet e tilla, kanë për qëllim që të diskreditojne Telekomin, të humbin besimin e konsumatorëve dhe si të tilla, i konsiderojmë tendencioze dhe të porositura, që ndikojnë negativisht në imazhin e Telekomit.