Ngrohtorja “Termokosi” të premten ka përfunduar sezonin e ngrohjes 2022/2023, pasi ditëve në vazhdim pritet të ngriten temperaturat, raporton Ekonomia Online.

Ndërprerja e ngrohjes u bë në një ceremoni solemne, ku i pranishëm ishte edhe kryetari i Komunës së Prishtinës, Përparim Rama.

Rama theksoi se përpos QKUK-së, ndërprerja do të bëhet në krejt Prishtinën.

“Kjo sezon ka qenë më efikasja dhe më e gjatë në historikun e Termokosit, pra kemi filluar më herët, po e përfundojmë më vonë dhe gjatë kësaj periudhe nuk kemi pasur asnjë problem. Kryeqyteti ka pasur ngrohje tërë kohën që u ka ofruar një konfront të shtuar të gjithë qytetarëve të kryeqytetit”.

“Sot që po e përfundojmë sezonin, QKUK-ja do të vazhdojë (me furnizim) për shkak se aty ka pacientë të cilët kanë nevojë për ngrohje”, tha Rama.

E kryeshefi i Termokosit, Fisnik Osmani tha se shpejt do të nisin përgatitjet për vitin e ardhshëm. Ai tha se gjatë kësaj kohe nuk e kanë ndërprerë asnjë ditë furnizimin me ngrohje, raporton EO.

Osmani, theksoi se “Termokos” përgjatë këtij sezoni më të gjatë ngrohës në historinë e ndërmarjes, ka ofruar ngrohje cilësore për 198 ditë me radhë pa asnjë ditë ndërprerje.

Ai tha se që nga 15 tetori “Termokos” ka zgjeruar rrjetin e ngrohjes edhe për 513 mijë m/2 më shumë sipërfaqe ngrohëse, ka ulur për 11 për qind humbjet e ujit dhe ka rritur 4 për qind liferimin e energjisë termike në raport krahasues me vitin paraprak.

“Kryeqyteti përmes ‘Termokosit’ po e merr karakterin e qytetit të gjelbër, ndërsa ‘Termokos’’ karakterin e një institucioni shumë serioz, që po kryen shumë mirë punët dhe po ofron shërbimin e ngrohjes për qytetarët”.

Ai rikujtoi se ndërmarrja po vazhdon me zgjerimin e hovshëm të rrjetit të ngrohjes dhe projekteve tjera, duke kërkuar, që konsumatorët të vazhdojnë të paguajnë faturat e ngrohjes, në mënyrë që të vazhdojmë zgjerimin e rrjetit të ngrohjes.

“Sot Termokosi po e përmbyll suksesshëm sezonin e radhës. Po bëheni gati që të kemi një sezon edhe më të suksesshme vitin e ardhshëm. Po e përmbyllim sezonin me 198 ditë aktive pa asnjë një ditë ndërprerje të ngrohjes”, tha Osmani.