Presidenti i Kosovës, Hashim Thaçi e ka njoftuar kryeministrin në detyrë, Albin Kurti se ai do të nis konsultimet me partitë tjera parlamentare për ta formuar Qeverinë e re.

Sipas letrës që Thaçi ia ka dërguar Kurtit në cilësinë e kryetarit të Vetëvendosjes, e ka informuar që meqenëse kjo parti nuk ka dërguar emrin e mandatarit të ri, atëherë Presidenti do të nis konsultime me partitë tjera.

“Me keqardhje konstatoj se me veprimet tuaja nuk e keni shfrytëzuar të drejtën të propozimit të kandidatit të ri për ta formuar Qeverinë, në pajtim me Vendimin e KQZ-së për certifikim të rezultateve përfundimtare të zgjedhjeve të parakohshme pëR Kuvendin e Kosovës”, thuhet ndër tjera në letrën e siguruar nga Ekonomia Online.

Thaçi i thotë tutje Kurtit se do të veprojë në bazë të kompetencave që i garantohen.

“Më duhet t’ju rikujtoj që në pajtim me mandatin kushtetues është përgjegjësi e imja që ta ruaj stabilitetin e vendit dhe ta garantoj funksionimin demokratik të institucioneve”, thuhet tutje.

Prandaj, shkruan Thaçi, në përputhje me nenin 95 të Kushtetutës dhe Aktgjykimin e Gjykatës Kushtetuese në rastin nr. K0103/14 do të bëj konsultim të përbashkët me të gjithë liderët e subjekteve politike parlamentare për hapat e mëtejmë.