Prokuroria pranë Gjykatës së Shkallës së Parë të Juridiksionit të Përgjithshëm Berat, përfundoi hetimin dhe kërkoi dënimin me 22 vite burg të të pandehurës D.Sh., për veprën penale “Trafikimi i personave të rritur”.

Prokuroria arriti në përfundimin se ka prova të mjaftueshme se e pandehura D.Sh., në bashkëpunim me shtetasit E.M. dhe F.D., ka kryer veprën penale për të cilën u akuzua. Ajo me veprime aktive ka rekrutuar, transportuar në shtetin italian viktimën M.S., me qëllim shfrytëzimin për prostitucion.

E pandehura D.Sh e ka rekrutuar, transportuar dhe trafikuar nga Berati në Vlorë e më pas në shtetin italian, nëpërmjet fshehjes dhe formës së ngjashme me skllavërimin duke e ndaluar të takohet dhe komunikojë me persona të tjerë dhe familjarët, duke e detyruar që t’i bindej çdo urdhri të saj. Ajo e ka trafikuar viktimën M.S., fakt ky i provuar edhe nga deklarimet e viktimës, se e pandehura i ka thënë: “Ti do të vish në Itali dhe po hape gojën të shkosh në polici, ne do të vrasim mamanë”.

Viktima ka deklaruar se rreth muajit shkurt të vitit 2018, ka qenë e papunë dhe e asistuar nga shërbimet sociale të qytetit të Beratit është njohur me të pandehurin E.M., njohje e cila pas pak kohësh është zyrtarizuar dhe në familjet e tyre. Pas përfundimit të ceremonive përkatëse ajo ka shkuar të jetojë te banesa e të fejuarit, i cili përgjithësisht e trajtonte mirë, por shumë shpejt nisën dyshimet për sinqeritetin e të pandehurit kur gjatë një bisede në rrjetin social Facebook, ajo e prezantuar në komunikim me të ëmën e tij, shtetasen D.S., ka zbuluar planin për dërgimin e saj në Itali.

Në përfundim të hetimeve dhe konkluzioneve të Prokurorisë pranë Gjykatës së Shkallës së Parë të juridiksionit të Përgjithshëm Berat, gjykata e shpalli të pandehurën D.Sh. fajtore dhe e dënoi me 17 vite burgim.