Përzgjedhësi i Sllovenisë në basketboll ka folur në superlativ për basketbollin e Kosovës të shtunën mbrëma në Mitrovicë. Trajneri serb, Igor Kokoshkov, në vijë të njëjtë është deklaruar edhe për mediet serbe, të hënën.

Sllovenia, që drejtohet nga Kokoshkov, të shtunën, në palestrën “Minatori” në Mitrovicë e mposhti Kosovën me shifrat 91:81, në kuadër të kualifikimeve për “Eurobasket 2017”. Ai në Kosovë ishte për herë të parë dhe është larguar me përshtypjet më të mira.

“Për herë të parë isha në Kosovë. Në disa momente në ndeshje madje edhe kemi humbur, por unë e kam ditur se do të jetë vështirë, pasi rruga ishte e lodhshme. Kemi fjetur në Prishtinë, ndërsa kemi luajtur në Mitrovicë, që është rreth një orë rrugë”, tha ai.

“Kjo nuk ishte për arsye të sigurisë, por pasi FIBA ka vlerësuar se palestra në Prishtinë nuk është adekuate. Por ne kemi pasur kushte të mira, ishim në një hotel të shkëlqyeshëm dhe në asnjë moment nuk kemi pasur gjëra të pakëndshme apo ndonjë provokim. Të kënaqur e lëshuam Kosovën”, shtoi Kokoshkov për gazetën serbe “Blic”.