Sot është formalizuar marrëveshja për grante shkollore përmes së cilës tri shkolla të mesme të ulëta në Komunën e Mitrovicës (SHFMU “Fazli Grajçevci”, SHFMU “Ismail Qemaili”, dhe SHFMU “Anton Zako Çajupi”) përfitojnë grante shkollore në vlerë të përgjithshme prej 37,577 € nga Ministria e Arsimit, Shkencës, Teknologjisë dhe Inovacionit (MASHTI).

Kjo përzgjedhje është bërë nga MASHTI pas aplikimit të shkollave për të përfituar mbështetje financiare nga Marrëveshja për Grante Zhvillimore në mes Republikës së Kosovës dhe Bankës Botërore, IDA (Asociacioni për Zhvillim Ndërkombëtar) për Projektin për përmirësimin e sistemit arsimor në Kosovë (ESIP). 

Me këtë rast kryetari i komunës, Agim Bahtiri, ka falënderuar MASHTI-n, Bankën Botërore dhe organizatat tjera të përfshira në këtë projekt për mbështetjen e tyre, për përmirësimin dhe avancimin e infrastrukturës mjedisore shkollore, dhe në të njëjtën kohë ka përgëzuar të gjithë stafin arsimor, mësimdhënësit e nxënësit në Komunën e Mitrovicës për përkushtimin e vazhdueshëm të tyre në zbatim të mësimit në distancë në këtë kohë pandemie.