Presidenti amerikan Donald Trump konfirmoi të dielën se i dërguari i tij special, Steve Witkoff, do të vizitojë Rusinë javën e ardhshme, në prag të një afati të vendosur për sanksione të reja ndaj Moskës dhe përshkallëzimit të tensioneve dypalëshe.

Duke folur para gazetarëve, Trump bëri të ditur se ka vendosur dy nëndetëse bërthamore “në rajon” pas një “përplasjeje” me ish-presidentin rus Dmitry Medvedev. Ai nuk sqaroi nëse bëhet fjalë për nëndetëse të pajisura me armë bërthamore apo vetëm me energji bërthamore, ndërsa vendndodhja e tyre nuk u bë publike për arsye sigurie.

Trump deklaroi se Witkoff do të udhëtojë në Rusi “javën e ardhshme, të mërkurën ose të enjten”, duke shtuar se ai ka pasur takime të mëparshme me presidentin rus Vladimir Putin në Moskë, para se përpjekjet për përmirësimin e marrëdhënieve mes Uashingtonit dhe Kremlinit të ndërpriteshin, raportojnë mediat franceze.

Kur u pyet për mesazhin që do të përcjellë Witkoff në Moskë dhe nëse ekziston ndonjë mundësi që Rusia të shmangë sanksionet, Trump u përgjigj shkurt: “Po, bëni një marrëveshje ku ndalon vrasja e njerëzve.”

Këto zhvillime vijnë në një kohë kur Trump ka vendosur një afat që përfundon në fund të javës së ardhshme, duke i kërkuar Rusisë të ndërmarrë hapa konkretë për t’i dhënë fund luftës në Ukrainë, përndryshe do të përballet me sanksione të reja, detajet e të cilave nuk janë bërë ende publike.