Atletja olimpike nga Uganda, Rebecca Cheptegei, ka vdekur në një spital kenian ku po trajtohej pasi 80 për qind e trupit të saj u dogj pasi i dashuri i saj e sulmoi me benzinë. Ajo ishte 33 vjeçare.

Një zëdhënës në Spitalin Mësimor dhe Referues Moi në qytetin Eldoret, Owen Menach, konfirmoi vdekjen e Cheptegei të enjten. Menach tha se vrapuesja në distanca të gjata vdiq herët në mëngjes pasi organet e saj dështuan.

Cheptegei garoi në maratonën e femrave në Lojërat Olimpike të Parisit më pak se një muaj para sulmit. Ajo përfundoi në vendin e 44-të, shkruan CNN, transmeton Klankosova.tv.

Babai i saj, Joseph Cheptegei, u tha gazetarëve në spital se kishte humbur një vajzë e cila ishte “shumë mbështetëse” dhe shpreson që drejtësia të shkojë vend.

Komandanti i Policisë së Qarkut Trans Nzoia, Jeremiah ole Kosiom tha të hënën se partneri i Cheptegeit, Dickson Ndiema, bleu një shishe me benzinë, e derdhi mbi të dhe i vuri flakën gjatë një mosmarrëveshjeje të dielën. Edhe Ndiema pësoi djegie dhe po trajtohet në të njëjtin spital.