Policia e Kosovës ka njoftuar se dy vajzat e mitura që ishin raportuar si të zhdukura, janë gjetur në një kafiteri në Prishtinë, bashkë me dy persona, njëri prej të cilëve ka qenë i mitur, raporton Express.

Përmes raportit 24 orësh, Policia ka bërë me dije se dy të miturat janë kthyer në shtëpi dhe se rasti po vazhdon të hetohet.

“Podujevë 10.02.2023 – 11:20. Dy ankuesit meshkuj kosovarë kanë raportuar se dy vajzat e tyre të mitura kanë dalë nga shtëpia dhe nuk dihet vendndodhja e tyre. Gjatë hetimit të rastit ora 23:30 njësiti policor, viktimat i ka gjetur në një kafiteri në Prishtinë së bashku me dy të dyshuar njëri prej tyre i mitur. Viktimat janë kthyer në shtëpi, rasti vazhdon të hetohet”, thuhet në raport.