Jonathan Crickx, zëdhënës i agjencisë së fëmijëve të OKB-së, Unicef në territoret palestineze, tha gjithashtu se shëndeti mendor i fëmijëve në Gaza po prekej rëndë nga lufta.

Crickx po fliste në një konferencë për media në Gjenevë, përmes një lidhjeje video nga Jerusalemi të premten, raporton AFP, gjatë së cilës ai foli edhe për numrin e fëmijëve në Gaza të ndarë nga prindërit e tyre.

“Ata paraqesin simptoma si nivele jashtëzakonisht të larta të ankthit të vazhdueshëm, humbje oreksi, nuk mund të flenë, kanë shpërthime emocionale ose panik sa herë që dëgjojnë bombardimet,” tha ai.

Para shpërthimit të konfliktit, Unicef vlerësoi se më shumë se 500,000 fëmijë në Rripin e Gazës kishin nevojë për shëndet mendor dhe mbështetje psiko-sociale. Tani ajo beson se “pothuajse të gjithë fëmijët kanë nevojë” për një ndihmë të tillë – më shumë se një milion fëmijë, tha Crickx.

“Fëmijët nuk kanë asnjë lidhje me këtë konflikt. Megjithatë, ata po vuajnë siç nuk duhet të vuajë asnjë fëmijë”, tha Crickx. “Asnjë fëmijë nuk duhet të ekspozohet kurrë ndaj nivelit të dhunës së parë më 7 tetor – ose nivelit të dhunës që ne kemi dëshmuar që atëherë.”

Ai bëri thirrje për një armëpushim në mënyrë që Unicef të mund të kryejë një numërim të duhur të fëmijëve që janë të pashoqëruar ose të ndarë, të gjurmojë të afërmit dhe të ofrojë mbështetje për shëndetin mendor.