Në Kristçërç të Zelandës së Re është mbajtur një ceremoni përkujtimore, në nderim të 50 viktimave të sulmit terrorist që ka ndodhur më 15 mars.

Kryeministrja e këtij vendi, Jacinda Ardern ka folur në organizimin e transmetuar edhe në media, bashkë me liderët islamikë dhe të mbijetuarit e sulmit.

Cat Stevens, këngëtari britanik që është konvertuar në fenë islame në vitet 1970, ka kënduar në këtë ceremoni.

Pjesë e këtij organizimi kanë qenë rreth 20,000 persona, i cili është mbajtur në Parkun Hagley.

Duke folur para pjesëmarrësve, Ardern ka thënë se Zelanda e Re ka “përgjegjësi për t’u bërë vendi që ne dëshirojmë të jetë”.

“Ne nuk jemi imunë nga virusi i urrejtjes, apo frikës. Kurrë nuk kemi qenë. Mrëpo ne mund të kthehemi në kombin që zbulon shërimin”, ka thënë ajo.

Në sulmin e 15 marsit kanë vdekur 50 persona, pasi një sulmues, i vetëquajtur supremacist i bardhë ka sulmuar dy xhami në Kristçërç dhe ka transmetuar aktin e tij drejtpërdrejt në rrjetin social Facebook.

Pas këtij sulmi, Zelanda e Re ka ndryshuar Ligjin për armët.