Presidentja e Komisionit Evropian, Ursula von der Leyen, deklaroi të mërkurën se dëshiron t’i hapë rrugën Kanadasë për t’u bërë “anëtarja e parë e asociuar” e BE-së, në një përpjekje për të krijuar lidhje të reja mes aleatëve në “një botë haptazi armiqësore”.

Ligjvënësit e BE-së e duartrokitën në këmbë pasi ajo bëri propozimin dhe më pas ajo shkoi për të përqafuar kryeministrin e Kanadasë, Mark Carney, i cili ndodhej në Parlamentin Evropian për të dëgjuar fjalimin e saj vjetor mbi gjendjen e Bashkimit.

Nevojiteshin partneritete të reja “në brishtësinë e ftohtë të botës së sotme”, u tha von der Leyen të pranishmëve në Strasburg, raporton Reuters.

Blloku prej 27 vendesh përballet me luftë në kufijtë e tij, për shkak të pushtimit të Ukrainës nga Rusia. Si BE-ja, ashtu edhe Kanadaja, janë përballur gjithashtu me rivalitet të ashpër në tregti dhe çështje të tjera nga administrata e presidentit amerikan Donald Trump dhe nga një Kinë gjithnjë e më këmbëngulëse në qëndrimet e saj.