Sulmet ajrore të qeverisë në veri të Afganistanit vranë 24 civilë, përfshirë edhe fëmijë dhe plagosën gjashtë të tjerë, thanë dëshmitarët për Associated Press të dielën.

Dy dëshmitarët e kontaktuar nga AP thanë se shumica e atyre që u vranë në sulmet ajrore të së shtunës, të cilat goditën fshatin Sayed Ramazan në provincën veriore të Kunduz, ishin civilë.

Rrethi Khanabad në provincën ku ndodhet fshati është i kontrolluar nga talibanët.

Ministria Afgane e Mbrojtjes, megjithatë, tha se sulmet ajrore vranë 30 luftëtarë talibanë, por shtoi se po zhvillohej një hetim për pretendimet se kishte civilë midis të vrarëve.

Sulmet ajrore vijnë ndërsa talibanët dhe negociatorët e caktuar nga qeveria po takohen për herë të parë në Katar për të diskutuar të ardhmen e Afganistanit dhe dhënien fund të luftës dekadëshe.

Zëdhënësi i talibanëve Zabihullah Mujahid dënoi sulmet ajrore dhe tha se talibanët nuk kishin asnjë operacion ushtarak në zonë në kohën e sulmit ajror.

Kombet e Bashkuara kanë kritikuar ashpër të dy palët në konflikt për vrasjen e pamëshirshme të civilëve në luftën e zgjatur të Afganistanit.

Bisedimet e paqes në Katar janë pjesë e një marrëveshje të ndërmjetësuar nga SHBA me talibanët që përfundimisht do të çojë në tërheqjen e trupave amerikane nga Afganistani.