Gjykata shtetërore në Sarajevë të mërkurën gjeti Vuk Ratkoviçin, një ish-anëtar i Brigadës së Visegradit të Ushtrisë Serbe të Bosnjës, fajtor për përdhunimin tre herë të një gruaje në periudhën midis qershorit 1992 dhe janarit 1993.
Ish-ushtari serb i Bosnjës, Ratkoviç u dënua me tetë vjet burg për përdhunimin e përsëritur të një gruaje në Visegrad gjatë luftës në vitin 1992 dhe 1993.

“Pas vlerësimit të provave, gjykata ka përcaktuar se prokuroria e Bosnjës dhe Hercegovinës ka vërtetuar, përtej çdo dyshimi të arsyeshëm, se i pandehuri ka kryer krimin siç përshkruhet në aktakuzë,” tha gjykatësja Mediha Pasiç.

Gjykata urdhëroi që Ratkoviç t’i paguajë viktimës 35,000 marka boshnjake (rreth 17,900 euro) kompensim.

Pasiç tha se gjykata besonte se viktima ishte “e detajuar dhe bindëse”, e cila gjithashtu u konfirmua nga prova të tjera.

“Gjykata nuk gjeti asnjë motiv nga ana e viktimës për ta akuzuar gabimisht të pandehurin,” shtoi gjykatësja.

Pasiç kritikoi mbrojtjen për argumentet e saj përfundimtare, në të cilat ajo sulmoi besueshmërinë e viktimës.

“Një qasje e tillë për të analizuar dëshminë e dëshmitares është e papranueshme,” tha ajo.

Ajo shtoi se avokatja e Ratkoviçit, Radmila Radosavljeviç, “këmbënguli në mënyrë të papërshtatshme duke folur për jetën seksuale të viktimës”, përcjellë Gazeta Express.

Si rrethana rënduese, gjykata mori parasysh faktin se Ratkoviq e përdhunoi viktimën e tij tri herë dhe nuk tregoi keqardhje. Nuk gjeti rrethana lehtësuese.

Ratkoviç është gjithashtu në proces gjyqësor në një rast të veçantë para gjykatës shtetërore për akuzat e kryerjes së krimeve të luftës në Strpci në Bosnjë në vitin 1993, kur luftëtarët serbë ndaluan një tren, morën 20 pasagjerë dhe i vranë.

Vendimi i ditës së mërkurë mund të apelohet.