Aktivistët e Lëvizjes Vetëvendosje kanë dorëzuar në Gjykatën Themelore dhe në Prokurorinë Themelore materialet me video ku, sipas tyre dëshmohet pafajësia e gjashtë aktivistëve të Lëvizjes, të arrestuar para më shumë se 3 muaj dhe duke u hetuar për terrorizëm.

Valdrin Ahmeti ka thënë se ky sistem i drejtësisë që i trajton ata si të dyshuar për sulmin mbi Kuvendin e Kosovës dhe se drejtësia sipas tij tashmë i ka edhe provat se aktivistët nuk kanë qenë fare as afër vendit ku ka ndodhur sulmi atë natë.

“Tashmë faktin që aktivistët e nuk kanë qenë aty dhe alibinë e dëshmuar me video dje në konferencën e Lëvizjes, e ka parë gjithë opinioni në Kosovë, por meqë mund të ketë hapësirë për keqkuptime, ne sot i kemi sjellë nga një kopje të kësaj videoje edhe prokurorisë e edhe gjykatës”, ka thënë aktivisti Valdrin Ahmeti pas dorëzimit të alibive në Gjykatë.

Ai ka thënë se kerkojmë lirimin e menjëhershëm të aktivistëve tyre që po mbahen në burg: Atdhe Arifi dhe Egzon Haliti, dhe aktivistët Adea Batusha dhe Frashër Krasniqi që po mbahen në arrest shtëpiak.

“Deri më tani, përveç fotografive nga disa markete dhe fotografive nëpër bankomate, hetuesia dhe prokuroria nuk ka paraqitur ndonjë provë bindëse as për t’i mbajtur 48 orë, e lëre më 95 ditë siç po ndodhë”, shtoi më tej Ahmeti.

Aty u përmend edhe vdekja e dyshimtë e Astrit Deharit në qendrën e paraburgimit në Prizren.

“Pikërisht duke vujatur padrejtësisht burgun nga ky proces gjyqësor i montuar politikisht, vdiq në rrethana shumë të dyshimta shkoku dhe bashkeaktivisti yne Astrit Dehari. Siç dëshmohet edhe nga videoja Astriti dhe 5 aktivistët e tjerë nuk kanë të bëjnë fare me rastin, dhe shteti duhet të japë përgjegjësi për burgosjen e tyre. Ne nuk do të ndalemi së kërkuari drejtësi në Kosovë, nuk do të ndalemi së kërkuar Drejtësi për Astritin deri sa të zbardhet i gjithë rasti”, ka thënë ai.

VV thotë se nuk do të ndalen së kërkuari Drejtësi për aktivistët që po mbahen nëpër burgje e arreste shtëpiake.