Ish-kryetari i Komunës së Kaçanikut, Xhabir Zharku është arrestuar sot.

Arrestimin e tij e ka konfirmuar zëdhënësi i Policisë së Kosovës, Baki Kelani.

“Sot, më 14.12.2019, Njësia për Hetimin e Krimeve Ekonomike dhe Korrupsionit e Ferizajt, ka arrestuar një të dyshuar për përfshirje në veprat penale: ‘Keqpërdorim i pozitës dhe autoritetit zyrtar” dhe ‘Ushtrim i ndikimit’”, tha Kelani.

Ai është arrestuar në Aeroportin e Prishtinës teksa tentonte të dilte jashtë vendit.

Sipas policies Zharku dyshohet lidhur me një rast që ka të bëjë me prona komunale në vitin 2010.

Me aktvendim të prokurorit , Zharku është dërguar në mbajtje për 48 orë.

Zharku ishte dënuar një herë, por iku në Suedi

Kujtojmë se më 21 prill të vitit 2011, Gjykata e Qarkut në Prishtinë e kishte shpallur Xhabir Zharkun fajtor për kryerjen e veprave penale “Të detyrimit” dhe “Të posedimit të paligjshëm të armës”. Ai ishte dënuar me tre vjet burgim dhe i ishte shqiptuar gjoba prej 1,500 eurosh. Zharku u largua nga Kosova duke i ikur kështu shkuarjes në burg.

Zharku, kishte jetuar lirshëm në Suedi, derisa Suedia kishte njoftuar autoritetet kosovare se nuk mund ta ekzekutoj dënimin në këtë shtet sepse s’ka marrëveshje ndërshtetërore.