Kur ajo filloi të merrej me skermë në moshën shtatëvjeçare në ishullin Guadeloupe të Karaibeve Franceze, Ysaora Thibus nuk guxoi kurrë të ëndërronte se do të bëhej një olimpiste.

“Unë nuk dija asgjë për këtë sport më parë. Sapo hyra në palestër mbeta e habitur se nuk e dija se për çfarë sporti bëhej fjalë”, pranon Thibus. “Të gjithë ishin me veshje të bardha, duke luftuar me njëri-tjetrin. Unë e doja me të vërtetë këtë sport dhe ndodhi që të bëhem shumë e mirë”.

Dhjetë vjet më vonë, asaj iu kërkua të bashkohej me INSEP – Instituti kryesor trajnues i Francës për atletët elitarë – i cili ka ndihmuar në zhvillimin e yllit të basketbollit Tony Parker dhe ish-tenistes numër një të botës Amelie Mauresmo. Thibus u stërvit dhe jetoi në kamp, ndërsa studionte gjithashtu për biznes. Ajo më vonë u zgjodh për ngjarjen individuale dhe ekipore të Francës në lojërat e saj të para olimpike “Londra 2012” dhe pastaj sërish katër vjet më vonë në LO “Rio 2016”. Sidoqoftë, të dy këto pjesëmarrje nuk shkuan aq mirë sa ajo shpresonte, dhe në të dyja rastet Thibus u largua pa medalje.

“Isha vërtet i zhgënjyer. Kam reflektuar shumë për këtë përvojë. Unë kam qenë në Paris për tetë vjet në atë kohë dhe kam menduar të dal nga zona ime e rehatisë,” shpjegon ajo.

E shtyrë nga zhgënjimi i saj, ajo u zhvendos në Los Angeles – SHBA – në vitin 2017 me shokun tjetër të ekipit olimpik dhe të dashurin Race Imboden për të eksperimentuar dhe për të punuar me skërmistë dhe trajnerë të tjerë.