Mbi 20 mijë persona janë evakuuar në Kanadanë perëndimore, pasi një zjarr i madh u përhap me shpejtësi drejt zonave të banuara përgjatë Liqenit Okanagan, në British Columbia.

I gjithë komuniteti i Summerland, ku jetojnë rreth 12 mijë banorë, është urdhëruar të evakuohet. Urdhri është dhënë edhe për rreth 8 mijë banorë në dhe përreth Peachland, ndërsa autoritetet ende nuk kanë përcaktuar numrin e shtëpive të shkatërruara.

Zjarri i njohur si “Bald Range” u raportua për herë të parë të premten në mbrëmje, por brenda pak orësh u përhap në një sipërfaqe prej rreth 50 kilometrash katrorë. Flakët përfshinë edhe komunitetin e vogël të Faulder dhe përparuan rreth 15 kilometra drejt Summerland.

Zyrtarët e emergjencave e kanë cilësuar zjarrin si një prej vatrave me përhapjen dhe rritjen më të shpejtë që është parë në këtë zonë.

Edhe zyrtari i emergjencave Erick Thompson u detyrua të largohej nga qendra e operacioneve dhe të evakuonte familjen e tij, pasi zjarri u afrua me zonat e banuara.

Pamjet e publikuara në rrjetet sociale tregojnë banesa të përfshira nga flakët, ndërsa banorët largohen me automjetet e tyre në rrugët e mbuluara nga tymi.

Mes personave të evakuuar janë edhe Kerry Gold dhe bashkëshorti i saj, Mike Elsinga. Çifti u largua nga banesa rreth orës 00:30, pasi pa flakët që po përhapeshin me shpejtësi nga malet përreth. “Është e frikshme. Po lëviz shpejt”, tha Gold, e cila së bashku me bashkëshortin kishte përgatitur edhe kafshën e tyre për evakuim.

Kanadaja është përballur vitet e fundit me sezone gjithnjë e më intensive të zjarreve, të cilat kanë shkaktuar evakuime masive dhe kanë përhapur tym në zona të mëdha të Kanadasë dhe Shteteve të Bashkuara.

Autoritetet vijojnë përpjekjet për të kontrolluar zjarrin, ndërsa banorët e zonave të prekura janë urdhëruar të qëndrojnë larg vatrave të zjarrit.