Ende pa u bërë një muaj që nga emërimi i Ole Gunnar Solskjaerit në pozitën e trajnerit të Manchester Unitedit, portieri rezervë i Manchester Unitedit, Sergio Romero, ka thënë se norvegjezi ka arritur ta kthejë lumturinë në Old Trafford.

Solskjaer ka arritur të sigurojë fitore në të gjitha pesë ndeshjet e zhvilluara që nga emërimi i tij si trajner i “Djajve të kuq”. Me këto fitore, ai e ka barazuar rekordin e vënë nga Sir Matt Busby për më së shumti fitore në ndeshjet e para me anglezët.

Trajneri norvegjez u emërua në këtë pozitë më 19 dhjetor të vitit të kaluar, vetëm një ditë pasi u shkarkua Jose Mourinho. Mediat botërore raportonin se lojtarët nuk ishin të kënaqur me portugezin dhe në klub mbizotëronte një atmosferë toksike gjatë kohës sa ai ishte trajner.

Solskjaer duket e ka ndryshuar këtë gjendje menjëherë, duke bërë që klubi të performojë shumë më mirë edhe në fushën e lojës. Romero beson se këto fitore ia kanë dhënë një vetëbesim të ri skuadrës së Manchester Unitedit.

“E kemi një ecuri të mrekullueshme. Jo vetëm sa i përket rezultateve, por edhe për mënyrën se si i kemi fituar këto ndeshje. Shënimi i pesë golave në një ndeshje na i ka shtuar shumë vetëbesimi”, ka thënë Romero.

“Atë që jemi duke e treguar tani, pas një Krishtlindjeje të mrekullueshme, është diçka që pritet nga një klub i këtij niveli. Kjo gjë e dëshmon atë se çfarë mund të arrijmë ne. Ecuria jonë gjatë periudhës së Krishtlindjes dhe Vitit të Ri e dëshmon këtë”.

“Trajneri e di se çfarë dëshiron të arrijë me klub, si dhe me ne si individë. Në fushë dhe brenda klubit, ai i ka bërë të qarta pritshmëritë për ne. Mund ta shihni edhe ju se ai e ka sjellë një lumturi në klub dhe gjithçka po shkon mirë”.