Trembëdhjetë pengje izraelite të liruar nga Hamasi tani kanë kaluar në Egjipt, sipas mediave lokale, si pjesë e një marrëveshjeje armëpushimi me grupin militant, raporton SKynews, transmeton Klan Kosova.

Dymbëdhjetë shtetas tajlandezë janë liruar gjithashtu nga Hamasi, ka thënë kryeministri i Tajlandës Srettha Thavisin. Pengët tajlandezë u liruan si pjesë e një marrëveshjeje të veçantë me Hamasin e ndërmjetësuar nga Katari dhe Egjipti, tha një burim për Reuters.

Times of Israel dhe Haaretz raporton se grupi i parë i pengjeve izraelitë kanë mbërritur në Egjipt pasi u mbajtën rob për 49 ditë.

Sipas periudhës së përkohshme të armëpushimit, e cila do të pauzojë luftimet për katër ditë në Gaza, të burgosurit palestinezë gjithashtu do të lirohen në këmbim. Raportohet se rreth 50 gra dhe fëmijë të mbajtur nga Hamasi do të lirohen gjatë kësaj periudhe.

Izraeli tha se do të ndalonte ofensivën e tij në Rripin e Gazës për një ditë shtesë për çdo 10 pengje shtesë të liruar.

Ata pritet të lirojnë gjithsej 150 të burgosur palestinezë nga burgjet izraelite gjatë armëpushimit të përkohshëm në këmbim të pengjeve, megjithëse zyrtarët kanë publikuar një listë prej 300 në rast se marrëveshja zgjatet.

Si pjesë e marrëveshjes, ndihma humanitare, ndihma mjekësore dhe karburanti do të lejohen në të gjithë enklavën e rrethuar, e cila është kapluar nga një krizë humanitare pas javëve të bombardimeve izraelite, me karburant dhe furnizime mjekësore të ndërprera.

Izraeli gjithashtu do të ndalojë mbikëqyrjen në jug të Gazës dhe do ta shkurtojë atë në gjashtë orë në ditë në veri.

Ndërkohë, ushtria izraelite ka paralajmëruar qindra mijëra palestinezë të zhvendosur që kërkuan strehim në jug të Gazës që të mos përpiqen të kthehen në shtëpitë e tyre në gjysmën veriore të territorit, i cili ka qenë fokusi i ofensivës tokësore kundër Hamasit, duke e përshkruar atë si një “zonë të rrezikshme lufte”.

Pavarësisht ndërprerjes së armiqësive, të dyja palët kanë paralajmëruar se lufta është larg përfundimit.