Drejtori i Drejtorisë së Shërbimeve Publike dhe Emergjencë, Arben Halili, ka mbajtur sot konferencën për media, me ç ‘rast u prezantuan të arriturat dhe sfidat e kësaj drejtorie gjatë kësaj periudhe dhjetë mujore të qeverisjes.

Ai theksoi se janë përmbushur të gjitha objektivat e platformës qeverisëse në planin afatmesëm në fushën e shërbimeve publike dhe se po punohet me intensitet të shtuar në adresimin e të gjitha sfidave dhe kërkesave në këtë sektorë.

“E arritur kryesore në këtë sektor në këtë periudhë qeverisëse është mbjellja e mbi 30,000 drunjve dekorativ dhe luleve në gjithë territorin e Ferizajt, eliminimi i mbi 150 deponive ilegale të mbeturinave, rivendosja e shenjave të komunikacionit dhe krijimi i ishujve përskaj rrethrrotullimeve, riparimi i mbi 5000 metrave kanalizim fekal dhe 500 metrave kanalizim atmosferik, qindra metra shtrirje të ndriçimit publik, ndërsa si sfidë e kësaj drejtorie gjatë kësaj periudhe qeverisëse ishte infrastruktura nëntokësore”.

“Lajmi më i rëndësishëm në këtë sektor për këtë vit është konfirmimi për themelimin e Qendrës së Informimit dhe Alarmimit, institucion ky që ekziston në disa qendra të Kosovës e që ka për synim të ndihmoj qytetarët dhe zvogëloj kohën e reagimit dhe koordinimit institucional në rastin e fatkeqësive natyrore dhe të tjera. Prioritet i kësaj drejtorie, është përveç projekteve të tjera, të funksionalizoj sa më shpejt, përkatësisht të vendos hidrantët në disa zona të qytetit me qëllim reagimin më të shpejtë në rastet e fatkeqësive nga zjarri si dhe kompletimi i infrastrukturës bazike shërbyese për qytetarët”, ka thënë Halili.