Interneti do të mbetet i kufizuar në Iran derisa zyrtarët të përcaktojnë se siguria e plotë është rivendosur pas protestave antiqeveritare në të gjithë vendin.

“Koha për t’u rikthyer në kushte normale do të njoftohet në të ardhmen dhe autoritetet duhet të na informojnë me siguri mbi konsideratat e sigurisë”, tha Mohammad Amin Aghamiri, president i Qendrës Kombëtare të Këshillit Suprem të Kiberhapësirës së Iranit.

Aghamiri shtoi se ndërprerja e internetit, e cila filloi më 9 janar ishte e nevojshme për t’iu kundërvënë luftës nga armiqtë e Iranit në hapësirën kibernetike.

Sipas Aghamirit, njerëzit aktualisht kanë qasje normale në shërbimet bankare dhe të blerjeve online përmes Rrjetit Kombëtar të Informacionit, NIN.

“NIN është një platformë përmes së cilës ne mund të garantojmë shërbime të qëndrueshme për publikun”, tha ai.

Më tej ai shtoi se aplikacionet e mesazheve vendase, motorët e kërkimit dhe shërbimet e inteligjencës artificiale do të zgjerohen për të minimizuar ndërprerjet në jetën e përditshme.

Ndërprerja e internetit në Iran hyri në ditën e katërt të hënën, sipas organit mbikëqyrës të sigurisë kibernetike NetBlocks , i cili shtoi se interneti fiks, të dhënat mobile dhe thirrjet janë çaktivizuar ndërsa mjetet e tjera të komunikimit po bëhen gjithnjë e më shumë objekt i sulmeve.