Zjarrfikësit në Francën jugore po përballen të enjten me disa zjarre të mëdha pyjore, të nxitura nga erërat e forta, ndërsa vendi po përballet me kushte të thata pas valës së fundit të të nxehtit në Evropë.

Ministri i Brendshëm, Laurent Nunez, bëri të ditur se tre vatra zjarri, dy prej të cilave në periferi perëndimore të qytetit port të Marsejës, kanë djegur gjithsej rreth 1,210 hektarë tokë (12.1 milionë metra katrorë).

Organizata Botërore Meteorologjike kishte paralajmëruar javën e kaluar se temperaturat rekord që përfshinë Evropën Perëndimore në fund të qershorit do të rrisin rrezikun e zjarreve, për shkak të nxehtësisë së vazhdueshme, lagështisë së ulët dhe vegjetacionit të thatë, shkruan Reuters.

Zjarri më i madh është regjistruar në rajonin Aude, pranë kufirit me Spanjën, ku janë djegur rreth 900 hektarë. Autoritetet lokale thanë se erërat e forta po e vështirësojnë punën e rreth 800 zjarrfikësve që po luftojnë me flakët.

Ndërkohë, zjarrfikësit po punojnë për shuarjen e një zjarri më të vogël në Rognac, pranë aeroportit të Marsejës, ndërsa një tjetër vatër në Lancon-Provence, që kishte përfshirë rreth 260 hektarë, është vënë nën kontroll. Sipas autoriteteve lokale, nuk raportohet për viktima.

Në zonë është ndjerë një erë e rëndë tymi, ndërsa një pilot i një fluturimi që po ulej në Marsejë u ka thënë pasagjerëve se era nuk vinte nga avioni, por nga zjarret në tokë, raportoi një dëshmitar i Reuters.