Zëdhënësi i Prokurorisë Themelore të Pejës, Shkodran Nikçi, gjatë një konference për media ka folur për vrasjen e Arlinda Zekajt në fshatin Vitomiricë.

I pyetur nëse djali i viktimës ishte prezent në momentin kritik, Nikçi tha se dyshohet se për fat të mirë, ai nuk ishte pranë nënës kur u sulmua për vdekje nga ish-kunati.

“Këto janë rrethana që besoj që nuk duhet t’i ndajmë me opinionin publik, për shkak se rasti është shumë i rëndë, mirëpo dyshohet se nuk ka qenë i pranishëm për fat të mirë, në momentin që ka ndodhur sulmi”, tha Nikçi.

Paraprakisht, Prokuroria ka dalë me një komunikatë, ku ka dhënë versionin e rastit dhe veprimeve, që ky institucion i ka ndëmarrë në përmbushjen e përgjegjësive.