Lidhja Demokratike e Kosovës ka mbajtur tubim elektoral në Klinë, ku u prezantuan projektet zhvillimore për qytetarët e kësaj ane, raporton Ekonomia Online.

Para të pranishmëve, kreu i LDK-së njëherësh kandidat për kryeministër, Lumir Abdixhiku, bëri të ditur se planifikon të investojë 5 miliardë euro në projekte kapitale për një periudhë katërvjeçare.

“Edhe Klina qenka ngritur në këmbë e qenka besatu për ndryshimin e madh nacional. Nga Klina e Ismet Rracit, Kolë Berishës, Ramë Manajt e patriotëve tjerë që dhanë kontribut të madh për këtë vend po e dëshmojnë kthimin e madh të LDK-së. Kjo kryengritje e jona na bind se ndryshimi po merr formë, LDK është ngritut dhe po i mbledh popullin para vetës”, tha Abdixhiku.

Ai tha se mbështetja për LDK-në po merr formë çdo ditë me takimet që po i mban nëpër qytete.

“Sot sikurse çdo ditë nuk dal të ju ftoj në përçarje, jeni pak për tu ndarë, kemi mjaft armiq jashtë për të na ndarë. Jam para jush që të shpalosi prpgramin tonë dhe kjo mundësi na qëndron deri më 9 shkurt kur edhe do ta bëjmë ndryshimin. Jemi këtu për ta prezantuar një program zjvillimor, një program që i përgjigjet nevojave të qytetarve, për rrugë më të mira e për paga më të dinjitetshme”, deklaroi Abdixhiku.

“LDK në këto zgjedhje është më e përgatitur dhe më unike dhe se me 9 shkurt kthehet tek ju. Zotohem sot para jush që çështjen e ujësllësit do ta zgjidhim menjëherë. Ne kemi pesë miliardë euro buxhet në vit dhe pesë për qind rritje ekonomike. Që në javën e parë për të gjithë shërbyesve publik do ta rriaimin pagën me koeficient 150 euro. Për të gjithë qytetarët që bartën rrugëve të Evropës do ta ndërtojmë Spitalin e Ri me 500 milionë euro”, u shpreh Abdixhiku, teksa premtoi edhe mësim tërëditor për fëmijët në Kosovë.

Kryetari i degës së LDK-së në Klinë, njëherësh kandidat për deputet, Alban Raci, tha se fitorja e kësaj partie do të kurorëzohet më 9 shkurt. Tha se kryeministër pas këtyre zgjedhjeve do të jetë Lumir Abdixhiku.