Ministri i Infrastrukturës, Arban Abrashi, bashkë me zëvendësministrin, Hamza Balje, ka vizituar sot Komunën e Dragashit ku janë duke u kryer disa projekte infrastrukturore.

Ministri Abrashi fillimisht është ndalur tek punimet në rrugën Zhur-Dragash, që është duke u bërë zgjerimi dhe rehabilitimi i rrugës.Abrashi theksoi se zgjerimi i rrugës është prioritet i Ministrisë së Infrastrukturës dhe krijon më shumë siguri për pjesëmarrësit në komunikacion.Më pas ministri bashkë me kryetarin e Komunës së Dragashit, Shaban Shabani, kanë vizituar edhe punimet që po zhvillohen në rrugën për Zaplluxhë.Kjo rrugë është duke u rehabilituar me një shtresë të re të asfaltit dhe duke u zgjeruar, që është projekt i Ministrisë së Infrastrukturës.Abrashi tha se kompletimi i infrastrukturës në Komunën e Dragashit do t’i shërbejë zhvillimit të turizmit dhe rritjes së vendeve të punës.

“Jemi në përfundim e sipër të asfaltimit dhe zgjerimit të rrugës nga Zaplluxha deri në Tyrbe, bazuar në memorandumin në mes Ministrisë së Infrastrukturës dhe Komunës së Dragashit. Asfaltimi i kësaj rruge është me rëndësi të madhe për banorët e kësaj ane dhe ndikon në zhvillimin e turizmit dhe hapjen e vendeve të reja të punës. Po punojmë në kompletimin e infrastrukturës së Dragashit, për ta kthyer në një zonë të rëndësishme turistike për Kosovën”, tha Abrashi.​