Kryetari i Prishtinës, Përparim Rama dhe drejtori i Shërbimeve Publike, Bekim Brestovci, vizituan Qendrën për trajtimin e qenve endacakë, ku është shënuar adoptimi i qenit të 1000-të, raporton Ekonomia Online.

Me këtë rast u tha se në kryeqytet janë rreth 3500 deri 4000 qen endacakë.

Kryetari Rama tha se komuna ka bërë një punë të madhe në menaxhimin e qenve endacakë, duke vënë në dukje se në katër vitet e fundit janë kastruar, vaksinuar dhe sterilizuar katër mijë qen endacakë.

Ai kritikoi mungesën e përkrahjes nga pushteti i niveli qendror, duke shtuar se pavarësisht premtimeve për ndarjen e 9.8 milionë eurove për këtë problem, deri më tani nuk është shpenzuar asnjë shumë për komunat. Rama tha se gjoba për ata që nuk i përmbahen kontratës është 3000 euro.

“Po e e japim për adoptim qenin e 1000-të.  Kjo është një punë e madhe, të cilën e kemi kryer dhe po vazhdojmë që ta kryejmë si kryeqytet për qytetarët. E dimë që kemi pasur sfida të mëdha me qentë endacakë dhe kemi sfida. Qeverisja e kaluar për tetë vjet i ka vaksinuar dhe sterilizuar vetëm 500 qenë, ndërsa ne për këto tri vjet kemi arritur që katër mijë qen t’i kastrojmë, vaksinojmë dhe sterilizojmë. Kemi ndërtuar strehimoren dhe punë  e madhe është bërë për të ndihmuar gjendjen në terren. Po e bëjmë gjithë këtë punë pa asnjë ndihme nga niveli qendror. Ata kanë thënë se janë ndarë 9.8 milionë euro, por deri me sot kanë shpenzuar zero buxhet në ndihmë komunës së Prishtinës dhe komunave të tjera. Nga janari deri tani kanë ndodhur 44 incidente, kafshime, prej tyre dy fëmijë dhe është problem që duhet të merremi. Publikisht kërkoj nga qeveria e Kosovës që të na bashkëngjitet në zgjidhjen e këtij problemi, jo vetëm të caktojnë buxhet dhe të mos e shpenzojnë. Vetëm me një bashkëpunim të mirëfilltë mund ta zgjidhim këtë problem. E kemi ekipin që shkon dhe i monitoron të gjitha pikat që janë dhënë qentë për adoptim se a i kanë kushtet”, tha kryetari Prishtinës, Rama.

Ndërsa, drejtori Brestovci tha se pavarësisht nga prania e qenve endacakë në qytet, tashmë janë 1000 më pak, por theksoi se një sfidë mbetet sjellja e qenve nga zonat tjera në Prishtinë.

Ai tha se ne kryeqytet deri tani janë 3500 deri më 4000 qen endacak.

“Sado që dikush mund të sheh qen në Prishtinë sot i kemi 1000 qenë më pak në Prishtinë. Po bëjmë apel që edhe niveli qendror të na ndihmojë. Problem janë edhe qentë nga zonat e tjera”, tha drejtori Brestovci.

Florentina Bajrami, e cila deri tani ka adoptuar 9 qen dhe sot e ka adaptuar qenin e 10-të, shprehu kënaqësi për mundësinë që u ofrohet këtyre kafshëve për një  jetë më të mirë.

“Ne jemi shumë të kënaqur që mund të adaptojmë qen, që ata kenë një ambient me të ngrohtë. I bëjë apele qytetarëve që të mos blejnë qen, por t’i adaptojnë ata”, tha Florentina Bajrami. /Ekonomia online/