Presidenti Agim Ademi ka pritur sot në zyrën e tij ambasadorin norvegjez në Kosovë, Per Strand Sjaastad.Të pranishëm në takim ishin edhe nënkryetari Agim Dibrani dhe anëtarja e KE të FFK-së, Vjollca Krasniqi.

Gjatë këtij takimi tejet miqësor presidenti Ademi e njoftoi ambasadorin Sjaastad me zhvillimin e futbollit në Kosovë, duke filluar nga ligat në të gjitha grupmoshat e deri te ekipet kombëtare, pastaj rreth projekteve në përmirësimin e infrastrukturës në partneritet me UEFA-n e FIFA-n por edhe institucionet shtetërore, si dhe rreth projekteve të ndryshme për zhvillimin e futbollit të të rinjve, femrave dhe të gjitha etniteteve që jetojnë në Kosovë.

Ndërkaq, ambasadori Per Strand Sjaastad u shpreh i lumtur për sukseset e Kosovës në futboll, si në Ligën e Kombeve ashtu edhe me rezultatet pozitive dhe paraqitjen e shkëlqyeshme në dy ndeshjet e para të këtij viti kundër Danimarkës dhe Bullgarisë. “Gjithmonë në ndeshjet që i luan Kosova jam në mesin e fansave, sepse si ish-futbollist i grupmoshave të reja në Norvegji, e shijoj më shumë suksesin tuaj në mesin e tifozëve. Përkrahja ime për ju dhe institucionin që ju e drejtoni do të jetë e vazhdueshme, sepse po i jepni kënaqësi dhe krenari popullit tuaj dhe jo rastësisht jeni storie e suksesit jo vetëm në Kosovë, por edhe në UEFA e FIFA”, ka theksuar me këtë rast ambasadori Sjaastad.

Në fund të takimit presidenti Ademi ia ndau ambasadorit norvegjez si dhuratë një fanellë të Kombëtares së Kosovës si dhe një plaketë me stadiumin “Fadil Vokrri”, duke e falënderuar njëherësh që çdo herë është i pranishëm në ndeshjet e Kosovës dhe po i jep përkrahje futbollit tonë.