I arratisuri nga Burgu i Dubravës para 12 ditësh, Ujkan Metaj, është arrestuar sot nga Policia e Kosovës në fshatin e tij Shushicë e Ulët të Istogut.

“Si rezultat i angazhimeve të pandërprera të Policisë së Kosovës, konkretisht të Drejtorisë Rajonale në Pejë, në kërkim të personit të dyshuar U.M, viti i lindjes1988 nё Istog, i cili ishte i kërkuar për vepren penale “Arratisja e personit tё privuar nga liria”, i njëti është arrestuar sot në orët e pasdites”, ka njoftuar Policia e Kosovës.

“Identifikimit dhe lokalizimit të tij i ka paraprirë ndërmarrja e masave aktive hetimore dhe operative, të cilat kanë rezultuar edhe me arrestimin e personit të dyshuar”.

PK thekson se të gjitha veprimet e mëtejme do të ndermerren në bashkëpunim dhe koordinim me organet e drejtësisë.

Më herët, gjatë ditës, Policia e Pejës kishte shpërndarë fotografinë e Metajt dhe kërkonte bashkëpunimin e qytetarëve për kapjen e tij.