Barcelona po kërkon të përforcojë repartin e sulmit këtë verë, dhe prej kohësh është raportuar se objektivi i tyre kryesor për pozicionin e “numrit 9” është sulmuesi i Atletico Madridit, Julian Alvarez.

Megjithatë, Atletico ka qenë i prerë se ai nuk është në shitje, duke detyruar katalanasit të shohin alternativa të tjera.

Sipas raportimeve të “Marca”, Barcelona tani ka shprehur interes për sulmuesin tjetër të Atletico Madridit, Alexander Sorloth.

Sulmuesi norvegjez ka bërë një fillim të mirë në Spanjë dhe është vlerësuar për fizikën dhe përshtatshmërinë e tij me sistemin e trajnerit Hansi Flick.

Klubi katalanas thuhet se ka bërë edhe një kërkesë zyrtare për lojtarin.

Plani fillestar i Barcelonës ishte të mbante Robert Lewandowski edhe për një sezon tjetër me një rol më të kufizuar dhe pagë më të ulët, por sulmuesi 37-vjeçar po shqyrton opsione të tjera dhe mund të largohet në fund të sezonit.

Nëse kjo ndodh, Barcelona do të mbetej me shumë pak opsione natyrale në sulm, ku aktualisht si alternativë mbetet vetëm Ferran Torres në rolin e qendërsulmuesit.

Sorloth, i cili ka edhe dy vite kontratë me Atletico Madridin, ka qenë një kundërshtar i vështirë për Barcelonën në të kaluarën, me 7 gola dhe 3 asistime në 15 paraqitje kundër tyre.

Në total me Atletico Madridin ka 17 gola në 47 ndeshje.

Ndërsa më parë Barcelona ishte e lidhur me emra si Victor Osimheni, mungesa e opsioneve konkrete po e bën Sorlothin një alternativë më të realizueshme dhe më pak “yje”, por më funksionale për nevojat aktuale të ekipit.