Komisioneri i Bashkimit Evropian (BE) për Fqinjësi dhe Zgjerim, Oliver Varhelyi, i lidhur online, ka përshëndetur iniciativën e “Ballkanit të Hapur” midis Shqipërisë, Serbisë dhe Maqedonisë së Veriut, liderët e të cilëve janë mbledhur sot në Tiranë.

“Është i lehtë të jesh mik i Ballkanit kur je me origjinë nga Hungaria, siç jam unë. Për të qenë i ndershëm, kam qenë i prirur pozitivisht ndaj kësaj iniciative, që fillimisht u quajt Minishengen, por për fat të keq kjo iniciativë u la mënjanë. Ndërkohë e cilësoj Ballkanin e Hapur një pasardhëse e denjë. Rajoni kërkon të jetë një i tërë, admiroj faktin që e ndjeni fort këtë nismë, ju vazhduat të shtynit përpara sepse kuptuat rëndësinë e integrimit rajonal. Ky është mesazhi më i mirë që rajoni mund të përçojë.

Komisioneri ftoi vendet e tjera të rajonit që për momentin e kanë refuzuar iniciativën, Mali i Zi, Kosova dhe Bosnje Hercegovina, “t’i bashkohen kësaj iniciative, sepse jo vetëm shton mundësitë për bizneset por do të ndryshojë realitetet në terren. Vetëm përmes konkretizimit të tregut rajonal, Ballkani Perëndimor mund të rrisë me një të tretën e prodhimit të brendshëm bruto”.

Sipas tij, “pa këtë bashkëpunim, Plan Ekonomik dhe i Investimeve nuk do të sjellë dot të gjitha përfitimet që ka për qëllim. Ne ofrojmë një investim me së paku 1/3 të PBB-se rajonale, por kjo funksionon vetëm në qofte se të gjithë ju do të merrni pjesë. Është me rendësi t’i tregoni botës se kur angazhoheni, ju bëni atë që premtoni”, tha ai që iu drejtua edhe kryeministrit maqedonas Zaev duke i thënë se kupton frustrimin e tij për negociatat “ndjej keqardhje që nuk kemi filluar Konferencën e Parë Ndërqeveritare me Shqipërinë dhe Maqedoninë e Veriut, ka ardhur koha që kjo të ndodhë”.