Ish-sekretari britanik i Thesarit, Rishi Sunak, do të bëhet kryeministër i ri i Britanisë.

Ja çfarë duhet të dini për të.

Ai ka fituar në garën e dytë këtë vit

Sunak ka humbur garën e shtatorit kundër kryeministres në shkuarje, Liz Truss. Truss ka dhënë dorëheqje gjashtë javë pas fitores. Në garën e dytë këtë vit, Sunak ka siguruar shpejt mbështetjen e deputetëve. Ai ka mbledhur 100 nënshkrime të deputetëve shumë para skadimit të afatit – duke përfshirë mbështetjen e deputetëve që më parë kanë mbështetur Trussin dhe ish-kryeministrin Boris Johnson.

Ai ka “parashikuar” problemet financiare nën udhëheqësinë e Liz Truss

Ai është përplasur disa herë me Truss-in në garën kundër saj, duke pretenduar se plani i kryeministres për të marrë hua para gjatë krizës me inflacion, tingëllon si “përrallë” që do të shtynte ekonominë drejt kaosit.

Ai është fëmijë imigrantësh

Prindërit e Sunakut kanë shkuar në Mbretëri të Bashkuar, nga lindja e Afrikës, dhe të dy kanë origjinë indiane. Vetë Sunak ka lindur në Sauthhempton më 1980, ku babai i tij ka qenë mjek i përgjithshëm dhe ku nëna e tij ka udhëhequr një barnatore. Ai tani do të jetë kryeministri i parë britaniko-aziatik.

Ai është deputet vetëm qe shtatë vjet

Sunak është zgjedhur fillimisht deputet më 2015 – për rajonin e Riçmondit dhe Jorkshërit – mirëpo është ngjitur shpejt në karrierë dhe është bërë ministër i Financave – apo kancelar – në shkurt të vitit 2020, kur kryeministër i Britanisë ka qenë Boris Johnson.

Ai ka qenë në krye të reagimit financiar ndaj pandemisë

Si kancelar nën udhëheqësinë e Johnsonit, Sunak ka qenë mbrapa politikave për ofrim të ndihmave në kohën e izolimit të nxitur nga pandemia e koronavirusit, duke përfshirë ato për restorantet.

Ai besohet se është një prej deputetëve më të pasur

Gruaja e tij është Akshata Murthy, vajza e miliarderit indian, Narayana Murthy. Vetë Sunak ka punuar në bankën për investime, Goldman Sachs, si dhe në dy fonde tjera. Revista Sunday Times ka thënë se pasuria e Sunakut kap vlerën e 730 milionë funtave.

Ai është përballur me zhurmë për taksat e gruas së tij

Përgjatë verës ka nisur të flitet se Akshata Murthy nuk i ka paguar taksat në Britani për fitimet e mëdha që ka pasur jashtë shtetit – diçka krejtësisht legale. Sunak e ka mbrojtur gruan e vet duke thënë “të njollosësh gruan time për të më sulmuar mua është diçka e tmerrshme” – mirëpo më në fund ajo është pajtuar për të paguar taksa shtesë. Sunak ka pasur përkohësisht edhe “green card” amerikane, dokument që i mundëson të jetojë përgjithmonë në Shtetet e Bashkuara.

Ai ka bërë fushatë për BREXIT

“Portet e lira” janë një prej ideve të tij të preferuara: zona rreth porteve apo aeroporteve ku mallrat mund të importohen apo eksportohen pa paguar taksa, ashtu që të inkurajohet tregtia.

Ai ka ëndërruar të jetë … një Jedi

Më 2016 ai u pati thënë disa nxënësve përgjatë një vizite se, kur ka qenë i vogël ka dëshiruar të jetë si Jedi Knight – karakter filmi – kur të rritet. Filmi i tij i preferuar në seritë Star Wars është The Empire Strikes Back.- REL