Ish-Presidenti amerikan Donald Trump i ka bërë shumë dëm Amerikës në pesë vitet e fundit, kryesisht duke nxitur pretendimin e rremë se zgjedhjet presidenciale të vitit 2020 ishin manipuluar, shkruan CNN. Por në fillim të kësaj jave ai bëri diçka vërtet të mirë, shton mediumi i njohur.

Në një intervistë me komentatoren konservatore Candace Owens, Trump jo vetëm që hodhi poshtë pretendimet e saj se më shumë njerëz kanë vdekur që kur vaksina Covid-19 u bë e disponueshme, por gjithashtu bëri një argument të qartë që njerëzit të vaksinohen, komentoi Chris Cillizza për CNN.

“Jo, vaksina funksionoi”, tha Trump. “Por disa njerëz nuk po e marrin atë. Ata që sëmuren shumë dhe shkojnë në spital janë ata që nuk e marrin vaksinën.” Ai shtoi: “Njerëzit nuk po vdesin kur po vaksinohen”.

Kjo, natyrisht, është saktësisht e vërtetë. Studim pas studimi kanë treguar se tri doza të vaksinës anti- Covid-19 vazhdojnë të mbrojnë mirë nga shtrimi në spital dhe vdekja, edhe nga varianti Omicron, që ka goditur Amerikën. Por është gjithashtu shumë e rëndësishme që Trump ta deklarojë këtë fakt, sepse shifrat tregojnë jo vetëm se republikanët janë shumë më pak të vaksinuar se demokratët, por edhe se ata janë më pak të vetëdijshëm për rreziqet që u paraqet virusi.

Vlen të përmendet këtu se Trump mund të kishte qenë një avokat më i fortë publik për vaksinat dhe përforcuesit shumë më herët. Dhe se duke përmendur viruset, si dhe maskat, për përfitime politike, ai mban të paktën një pjesë të përgjegjësisë për republikanët që refuzojnë vaksinimin.

Siç vuri në dukje Zach Wolf i CNN në fillim të këtij muaji, “Shtetet demokratike që votuan për Presidentin Joe Biden janë vaksinuar përgjithësisht nga më shumë se 60%. Shtetet republikane që mbajtën anën e ish-Presidentit Donald Trump janë përgjithësisht nën këtë mesatare”.

Është e paqartë nëse argumenti mbrojtës për vaksinën nga ana e Trump do të jetë i mjaftueshëm për t’ua ndryshuar mendjen e disa prej mbështetësve të tij më të zjarrtë. Ish-Presidenti në fillim të kësaj jave pranoi se kishte marrë dozën e tretë të vaksinës dhe kjo, për shumë të pavaksinuar, është kthyer në një çështje politike dhe jo të shëndetit publik.