Gjykata Themelore në Prishtinë, të premten pas rigjykimit, sërish i ka shpallur fajtorë të akuzuarit për vrasje dhe lëndim i lehtë trupor, Besnik dhe Bajram Bedrolli.

Ata akuzohen se në shkurt të vitit 2015, në restorantin “Agoni” në fshatin “Banullë”, të Lipjanit pas një mosmarrëveshje mes tyre, në bashkëkryerje e kishin privuar nga jeta tani të ndjerin Urim Dushullofci, raporton “Betimi për Drejtësi”.

Sipas aktgjykimit të shpallur nga kryetarja e trupit gjykues, gjykatësja Naime Krasniqi- Jashanica, i akuzuari Besnik Bedrolli për veprën penale “vrasje e rëndë” është dënuar me 11 vjet burgim, ndërsa për veprën penale të “armëmbajtjes pa leje” me një vit e gjysmë burgim. Ashtu që gjykata, të njëjtit i ka shqiptuar dënim unik me burgim në kohëzgjatje prej 12 vitesh.

Për të akuzuarin Bajram Bedrolli, gjykata ka bërë ricilësimin e veprës penale nga vepra penale “vrasje e rëndë” të kryer në bashkëkryerje, në veprën penale “lëndim i lehtë trupor”, në dëm të të dëmtuarve Eroll Qyqalla dhe Skender Ademi.

“Nuk kemi gjetur që Bajram Bedrolli ka kryer veprën penale të vrasjes së rëndë nga neni 179, paragrafi 1 lidhur me paragrafin 1.5 të KPRK-së, në bashkëkryerje, nga neni 31. Në vështrim të nenit 360 gjykata ka gjetur se i njëjti ka kryer veprën penale, “lëndim i lehtë trupor”, nga neni 188 paragrafi 2 të KPRK-së, në dëm të të dëmtuarve Eroll Qyqalla dhe Skender Ademi”, ka thënë gjykatësja Krasniqi- Jashanica.

Të akuzuarit Bajram Bedrolli, për kryerjen e veprës penale “lëndim i lehtë trupor”, nga neni 188, paragrafi 2 të KPRK-së, i është shqiptuar dënim me burgim në kohëzgjatje prej 2 vite e 10 muaj.

Gjykatësja Krasniqi-Jashanica ka njoftuar se gjykata një zëri ka vendosur që ndaj të akuzuarit Bajram Bedrolli të ndërpritet masa e paraburgimit, dhe i njëjti të lihet në mbrojtje në liri deri në plotfuqishmërinë e këtij aktgjykimi.

Ndërsa, për të akuzuarin Besnik Bedrolli, gjykatësja ka thënë se do i vazhdohet paraburgimi deri në plotfuqishmërinë e këtij aktgjykimi por jo më gjatë se sa dënimi i shqiptuar.

Dy të akuzuarit Bedrolli janë obliguar që të paguajnë edhe shpenzimet procedurale dhe atë, secili veç e veç nga 500 euro në emër të paushallit, dhe nga 50 euro për fondin për kompensimin e viktimave të krimit.

Përfaqësuesi i palës së dëmtuar është udhëzuar në kontest civil për realizimin e kërkesës pasurore juridike.

Pala e pakënaqur ndaj këtij vendimi ka të drejtë ankese në afat prej 15 ditësh nga dita e marrjes së kopjes së këtij aktgjykimi.

Gjykata Themelore në Prishtinë me 27 nëntor 2018, të akuzuarin Besnik Bedrolli, për vrasje të rëndë e kishte dënuar me 14 vjet e 6 muaj burgim, ndërsa për armëmbajtje pa leje, me 1 vit burgim, ndaj tij gjykata kishte shqiptuar dënim unik prej 15 vjet burgim efektiv.

Ndërsa i akuzuari Bajram Bedrolli, për ndihmë në kryerjen e veprës penale “vrasje e rëndë”, ishte dënuar me 9 vite e 6 muaj burgim, kurse për armëmbajtje pa leje ishte dënuar me 1 vit burgim, mirëpo ndaj tij kjo gjykatë kishte shqiptuar dënimin unik prej 10 vite burgim.

Mirëpo, në vitin e kaluar Gjykata e Apelit këtë rast e kishte kthyer në rigjykim, duke anuluar aktgjykimin e shkallës së parë.

Ndryshe, sipas aktakuzës së ngritur më 12 tetor 2015, pretendohet se Besnik Bedrolli dhe Bajram Bedrolli, më 14 shkurt 2015, rreth orës 02:00, në restorantin “Agoni” në fshatin Banullë të Lipjanit pas një mosmarrëveshje mes tyre, në bashkëkryerje e kanë privuar nga jeta tani të ndjerin Urim Dushullofci.

Sipas aktakuzës, të njëjtit fillimisht ishin fjalosur e pastaj e kishin sulmuar të ndjerin Dushullovci dhe të dëmtuarit Eroll Qyqalla dhe Skënder Ademi me mjete të forta, i ndjeri e kishte përdorur armën e tij për ta evituar sulmin, mirëpo i pandehuri Besnik Bedrolli, me revolen e tij në afërsi rreth një metër ka shtënë në drejtim të Dushullovcit katër herë dhe nga plagët e marra, ai ka vdekur në vendin e ngjarjes, ndërsa të pandehurit kishin ikur nga vendi i ngjarjes.

Me këto veprime, prokuroria i ngarkon të akuzuarit me veprën penale të “vrasjes së rëndë” nga neni 179 i KPRK–së dhe për “mbajtja në pronësi, kontroll ose posedim të paautorizuar të armëve” nga neni 374 i KPRK–së.