Deputeti serb i parlamentit të Malit të Zi, Milan Knezheviq, e ka quajtur akt shumë të ulët miratimin nga ana e kuvendit të këtij shteti, të rezolutës që e cilëson atë që ndodhi në Srebrenicë, më 1995, si gjenocid.

“Kjo rezolutë është shumë më e turpshme sesa njohja e turpshme e të ashtuquajturës pavarësi e Kosovës”, ka thënë ai.

Deputeti nga radhët e Frontit Demokratik ka shkuar mëtutje, duke pretenduar se dokumenti që u votua nga parlamenti në Podgoricë, nuk është bërë e shkruar në Mal të Zi.

“Sikur të shkruhej këtu, kurrë nuk do të nënshkruhej, pasi shumica e popullsisë është kundër kësaj rezolute”, ka shtuar ai në një intervistë televizive në Beograd, përcjellë Klankosova.tv. “Kjo është një fushatë e përgjithshme kundër Serbisë. E akuzuan popullin e vetë…Fronti Demokratik nuk do ta durojë përçminim e popullit serb dhe të Kishës Ortodokse Serbe në Mal të Zi”.

Knezheviq është vetëm njëri nga politikanët e radhës, në Podgoricë e gjithandej zonave të banuara me serbe, që ka vjellë helm në raport me rezolutën e javës së kalaur të parlamentit të Malit të Zi, që njohu gjenocidin në Srebrenicë.

Edhe presidenti i Serbisë, Aleksandar Vuçiq ka akuzuar kuvendarët dhe vetë shtetin e Malit të Zi se me vendim në fjalë, deshën t’i vënë një njollë të rëndë popullit serb, kudo që jeton.