Pa u mbushur 24 orë nga konferenca e përbashkët me kryeministrin e Shqipërisë, Edi Rama, Gent Cakaj, ministër i Jashtëm në detyrë, njofton se do të dalë sërish përpara mediave.Ministria për Evropën dhe Punët e Jashtme ka njoftuar se Cakaj do të dalë sot  në orën 11:30 në një konferencë për shtyp.

Kujtojmë që ministri ishte i pranishëm edhe në konferencën e mbajtur ditën e djeshme nga Rama, por ku nuk pati mundësi të bëntë ndonjë deklaratë.

Kryeministri në konferencë u shpreh se vendimin për mos hapjen e negociatave nuk e konsideron si dështim të qeverisë së tij, por e cilëson si pasojë të problemeve të brendshme të Bashkimit Evropian.  Zëra brenda spektrit  politik  kërkojnë të paktën dorëheqjen e ministrit, për të mbajtur një përgjegjësi morale.

Cakaj reagoi edhe dje në llogarinë e tij në “Facebook” duke u shprehur: “Mungesa e konsensusit në Këshill për çeljen e menjëhershme të negociatave për anëtarësim me Shqipërinë nuk vjen si rrjedhojë e interpretimeve kundërthënëse lidhur me progresin e vendit, por si pasojë e vizioneve të ndryshme për reformën strukturore të Bashkimit Evropian në përgjithësi.

Përderisa nuk ka një ujdi absolute për të filluar bisedimet për anëtarësim me Shqipërinë dhe Maqedoninë e Veriut, ekziston një pajtueshmëri e plotë se të dy vendet kanë përmbushur të gjitha kushtet e paraqitura në konkluzionet e qershorit të vitit 2018.

Pavarësisht kësaj, Shqipëria do të vazhdojë angazhimet e saj reformatore dhe përpjekjet e mëtejme në shërbim të aspiratës evropiane”.