Tenderi tre milionësh për Kompleksin Memorial “Adem Jashari”, ka përfunduar në Gjykatën Komerciale, raporton Ekonomia Online.
Pas dorëzimit të padisë dhe kërkesës për shtyrje të ekzekutimit të Vendimit të OSHP-së, avokati i Institutit të Shkencës dhe Teknologjisë “INSI” SH.P.K., Qëndrim Arifi, paraqiti “shkeljet” e Ministrisë së Kulturës, Rinisë dhe Sportit dhe Organit Shqyrtues të Prokurimit, lidhur me tenderin: “Zhvillimi i master-planit për Kompleksin Memorial “Adem Jashari”, në vlerë tre milionë euro.
Arifi, ka thënë se faza e vlerësimit të ofertave është përcjellur me parregullsi e me ndikime brutale nga pala e tretë.
Ai ka thënë se Instituti nuk është pajtuar me vlerësimin për dy arsye kryesore, e para sipas tij, është se dosja e këtij tenderi e ka saktësuar në mënyrë të qartë se “pjesa ideore e projektit dorëzohet në mënyrë fizike, ndërsa pjesa tjetër në mënyrë elektronike”, sipas tij, i vetmi operator ekonomik që ka dorëzuar në këto dy forma është Instituti për Shkencë dhe Teknologji.
“Më lejoni të shpreh shqetësimin e thellë për faktin që ky tender që nga fillimet e tij e posaçërisht në fazën e vlerësimit të tenderëve por edhe në fazën e shqyrtimit të ankesës “INIS” në Organin Shqyrtues të Prokurorimit është përcjell me ndikime, madje ndikime brutale nga palët e treta, respektivisht palët e interesit në këtë procedurë. Andaj pasi janë publikuar rezultatet për pjesën e Planit Ideorë “INIS” aspak nuk është pajtuar me vlerësimi që ju ka bërë. Instituti nuk është pajtuar me vlerësimin për dy arsye kryesore. E para, dosja e këtij tenderi e ka saktësuar në mënyrë të qartë ‘pjesa ideore e projektit dorëzohet në mënyrë fizike, ndërsa pjesa tjetër në mënyrë elektronike. I vetmi operator ekonomik që ka dorëzuar në këto dy forma është Instituti për Shkencë dhe Teknologji. Dy të tjerët e kanë dorëzuar vetëm fizikisht”, ka thënë ai.
Shkelja e dytë, sipas avokatit ka qenë se njëra nga kompanitë e ka zbuluar identitetin e saj, gjatë ofertimit. Sipas tij, në fazën e ofertimit kompanitë do duhej të ofertonin me shifra, pa emër.
“Shkelja e dytë ka të bëjë me njërën nga kompanitë e cila e zbulon identitetin e saj. Tenderët kryesisht të projektimit, zakonisht kur shkojnë në ofertë fizike, duhet të jenë anonim, me shifra. Njëra kompani i hap të dhënat, ne sot e dijmë emrin dhe mbiemrin e asaj kompanie, të atyre operatorëve ekonomikë”, ka thënë ai.
Në fund, avokati Qëndrim Arifi ka bërë të ditur se Organi Shqyrtues i Prokurimit ka refuzuar ankesën e tyre dhe ka konfiskuar taksën e ankesës, në vlerë prej 5 mijë euro.