Eurozona ka nevojë për një instrument të ri dhe të përbashkët fiskal, në mënyrë që të mbajë të bashkuara vendet anëtare, edhe kur janë nën sulmin e tregjeve financiare, kështu deklaroi numri një i Bankës Qendrore Evropiane, Mario Draghi.

Muajin e ardhshëm, liderët e Bashkimi Evropian do të takohen dhe do të diskutojnë pikërisht çështjet që mbajnë pezull reformimin e unionit.

Kështu, ai ka bërë një propozim të ri – atë të krijimit të një instrumenti të mbështetur nga qeveritë e unionit për të ndihmuar në rast emergjence vendet e dobëta nëse penalizohen nga tregjet në periudhë krizash.

“Na duhet diçka e tillë për të ruajtur konvergjencën në rast krizash të mëdha, pa pasur nevojën të mbingarkojmë politikat monetare”, nënvizoi Draghi.

Ai nuk dha shumë detaje dhe shtoi se një instrument i tillë financiar është shumë i vështirë për t’u konceptuar dhe dizenjuar.