Prokurori Special i EULEX-it, Paul Flyn përfundimisht e ka mbyllur historinë e aktakuzës së ngritur për një tender të Korporatës Energjetike të Kosovës (KEKO 10-391-11), ku akuzoheshin 6 persona, në mesin e tyre edhe drejtori operativ i KEK-ut, Njazi Thaçi dhe Hysni Hoxha, ish-kryetar i Organit Shqyrtues të Prokurimit.

“Sot në Gjykatën Themelore në Prishtinë është tërhequr aktakuza e KEK-ut me arsyetimin se nuk është vërtetuar dhe nuk ka pasur prova për asnjë pretendim se në këtë rast ka pasur shkelje ligjore apo dokumente të falsifikuara në dosjen e tenderit të KEK-ut. Në njoftimin për tërheqje të aktakuzës mes tjerash thuhet se: “Përgjatë dy viteve të zhvillimit të hetimeve, asnjë prej këtyre dëshmitarëve, që janë intervistuar nga Prokuroria, sikurse ata nga KEK-u po ashtu edhe ata nga Operatorët Ekonomik që janë refuzuar gjatë procedurës tenderuese, nuk kanë ofruar asnjë provë konkrete për të vërtetuar se kishin pasur ose dëme ose realisht ndonjë dëm substancial material. Gjithashtu, kjo çështje nuk është shqyrtuar as nga Policia e as nga ekspertiza”,  ka deklaruar Drejtori i Zyrës për Marrëdhënie me Publikun në KEK, Skënder Bucolli për rtklive.

Pretendimeve për të cilat nuk gjeti fakte asnjë prokuror vendor e as ndërkombëtar, tashme u dha fund Prokurori Special I EULEX-it, Paul Flyn, kanë deklaruar edhe zyrtarët e lartë të  KEK-ut

Bucolli, ka deklaruar se KEK-u përveç se po dëshmon se është është faktor stabiliteti sa i përket sektorit energjetik në vend, po tregon edhe transparencë. Sipas tij, kjo është edhe një dëshmi se, si KEK-u po ashtu edhe zyrtarët e saj gjithnjë kanë qenë bashkëpunues në këtë drejtim, andaj, ju sigurojmë se edhe tani e tutje do të jemi të gatshëm të përgjigjemi çdo kërkesë që vjen nga organet përkatëse.

“Sidoqoftë, ne kemi deklaruar qysh në fillim të këtij procesi se sipas dokumentacionit që ne kemi pasur  në  posedim, në këtë rast KEK-u ka shpërblye operatorin ekonomik, i cili i ka qenë  me çmim dukshëm më të lirë dhe i ka plotësuar të gjitha kriteret e parapara në dosjen e tenderit. Këtë e ka vërtetuar edhe Organi Shqyrtues i Prokurimit (OSHP) si organ i vetëm ekzekutiv dhe  më kompetent juridik për këtë çështje. Për më tepër, kemi poseduar edhe konfirmimin nga menaxheri i projektit se kontrata është realizuar konform kushteve të parapara më kontratë”. ka thënë Bucolli.