Pritjes së gjatë po i vjen fundi.

U rikthye Bundesliga, janë rrugës për t’u rikthyer La Liga, Premierliga dhe Serie A, por gjithashtu edhe kampionati ynë, IPKO Superliga.

Ministria e Shëndetësisë u ka dhënë leje klubeve që nga kjo e hëne, ashtu si në Spanjë, të nisin stërvitjet në grupe.

Prishtina tashmë e ka bërë një gjë të tillë.

Me maska dhe dorëza, futbollistët e Prishtinës kanë nisur përgatitjet për sezonin 2019/20, të lënë në gjysmë për shkak të COVID-19.

Postimi i Prishtinës në Facebook:

Skuadra i rifillon zyrtarisht seancat stërvitore

FC Prishtina falënderon Ministrin Vitia dhe FFK-në

Prishtinë, 18 maj 2020 – Skuadra jo e kompletuar e FC Prishtina sot për herë të parë ka dal në seancat stërvitore në kompleksin stërvitor të Bërnicës.

Skuadra dhe i tërë klubi, sot më në fund morën lajmin e shumëpritur të nisjes së seancave stërvitore dhe sipas rekomandimeve në fillim të muajit qershor edhe kampionati. Për çka, FC Prishtina falënderon jashtëzakonisht shumë Ministrin e Shëndetësisë, Arben Vitia, si dhe kryetarin e FFK-së, Agim Ademi, i cili pa nda ka garantuar mbarëvajtjen e kampionatit. FC Prishtina po ashtu falënderon të gjithë akterët e përfshirë në rinisjen e kampionatit.