Afatin prej tri ditësh, i paraparë për ankesë ndaj vendimit të Gjykatës Themelore të Prishtinës, e cila ka refuzuar të rigjykojë një tentativë vrasjeje të vitit 2011, nuk ka arritur ta shfrytëzojë Prokuroria Themelore e Prishtinës.

Punëtorja e arkivit, Mevlude Statovci, e cila është përgjegjëse për dorëzimin e çdo vendimi konfidencial te kryeprokurori i kësaj prokurorie, Imer Beka, nuk e ka dorëzuar atë me kohë.

Si pasojë, nën dyshimin për fshehje të qëllimshme të këtij dokumenti, Statovci është dërguar në komision disiplinor. Këto ditë ajo është dënuar me ndalesë prej 30 për qind të pagës.

Statovci ka thënë se këtë veprim nuk e ka bërë me qëllim, porse si është “skajuar nuk e di as vetë”.

Në anën tjetër, prokuroria ka njoftuar se është duke shqyrtuar një bazë të re ligjore për të bërë sërish kërkesë në gjykatë./KD/