Në konferencën “Opportunity Scouting”, organizuar nga GIZ-i dhe Ministria e Arsimit, Shkencës dhe Teknologjisë, ministri i Kulturës, Rinisë dhe Sportit, Kujtim Gashi, bëri të ditur se ministria të cilën ai e drejton, përmes strategjisë dhe planit të veprimit, ka parashtruar hapat për realizimin e objektivave dhe aktiviteteve për periudhën kohore 2018-2022.

“Ministria e Kulturës, Rinisë dhe Sportit përmes strategjisë dhe planit të veprimit, ka parashtruar hapat për realizimin e objektivave, për realizimin e aktiviteteve dhe përcaktimin e përgjegjësive dhe mjeteve për periudhën kohore 2018-2022”.

Sipas Gashit, ky dokument strategjik trajton të rinjtë nga mosha 15 deri në 24, raporton Ekonomia Online.

“Dokumenti strategjik trajton të rinjtë nga mosha 15 deri 24 vjeç dhe politikat ndërsektoriale në përputhje me ligjin për pjesëmarrjen e rinisë. Në të njëjtën kohë ne kemi planifikuar në planin legjislativ edhe ndryshimin e Ligjit për fuqizim dhe pjesëmarrje të të rinisë. Në kuadër të kësaj ne kemi të gatshëm edhe koncept-dokumentin për rininë i cili pritet t’i shfaqet qeverisë në njërën nga mbledhjet e ardhshme”.

Ministri Gashi tregoi për fondin rinor, i cili u mundëson angazhim në punë praktike të rinjve nëpër kompani e biznese kosovare, raporton EO.

“Në kuadër të MKRS-së ne kemi formuar fondin rinor, përmes të cilit jemi duke angazhuar praktikantë me pagesë nëpër kompani e biznese në vendin tonë, në mënyrë që këta të rinj të marrin një përvojë të mirë në shërbim të aftësimit profesional dhe përgatitjes së tyre në të ardhmen të jenë të gatshëm edhe për tregun e punës”.

Sipas ministrit Gashi, është e rëndësishme që të rinjtë kosovarë të mos ndihen të pafuqishëm në realizimin e ëndrrave të tyre.

“Është shumë e rëndësishme që të rinjtë kosovarë të mos ndihen të anashkaluar dhe të pafuqishëm në realizimin e ëndrrave të tyre. Në shërbim të kësaj përfshirje në aktivitetet shoqërore, informim, ngritje të kapaciteteve profesionale të të rinjve, është në fokus Ministria e Kulturës, Rinisë dhe Sportit”.

Gashi bëri thirrje që të vazhdohet me krijimin e hapësirave për të rinjtë përmes bashkëpunimit të institucioneve në mënyrë që t’u sigurohet infrastruktura për formim dhe informim individual dhe kolektiv të tyre.

Helmut Zelloth, ekspert për orientim në karrierë nga BE, tha se ky projekt ka qenë për të rinjtë kosovarë dhe, sipas tij, ka rezultuar të jetë mjaft i suksesshëm.

“Në BE kemi prioritet fusha të tilla dhe se bashkëpunimi e bën zhvillimin më të mirë dhe kritik”, tha ai.

Heset Sahiti nga MAShT tha se qeveria është e vetëdijshme për nevojat e shërbimeve dhe edukimin për orientimin në karrierë, raporton EO.

“Qeveria e Kosovës është e vetëdijshme për nevojat e shërbimeve dhe edukimin për orientim në karrierë, për këtë plani strategjik i arsimit në Kosovë përfshin planin e karrierës si një nga treguesit të zbatimit të suksesshëm të strategjisë së saj”, tha Sahiti.

Më shumë se 30 të rinj nga komuna e Ferizajt kanë punuar intensivisht për të hartëzuar të gjitha shërbimet e qasshme për të përmirësuar tranzicionin e tyre nga shkolla në punë.